“Qəbələ” – “Sumqayıt” – 1:1
28 yanvar 2017. Saat 15:00. Qəbələ şəhər stadionu, 1000 tamaşaçı
Baş hakim: Əliyar Ağayev
Baş hakimin köməkçiləri: Zeynal Zeylanov, Rza Məmmədov
Dördüncü hakim: Rəvan Həmzəzadə
AFFA nümayəndəsi: Arif Fərəcov
Hakim-inspektor: Şaiq Həmidov
Sarı vərəqələr: Ruslan Qurbanov, 51 (hakim qərarına etiraz); Tellur Mütəllimov, 54 (qeyri-idman hərəkəti); Urfan Abbasov, 88 (qeyri-idman hərəkəti) // Azər Salahlı, 13 (qeyri-idman hərəkəti); Fərhad Qıstarov, 31 (qeyri-idman hərəkəti); Nicat Muxtarov, 51 (qeyri-idman hərəkəti); Vurğun Hüseynov, 81 (qeyri-idman hərəkəti)
Qollar: Vitali Vernidub, 58 // Məhəmməd Qurbanov, 53
Artırılan vaxt: I hissədə 1 dəq.; II hissədə 4 dəq.
Bu gün Topaz Premyer Liqasında 2016-2017-ci illər mövsümünün ikinci yarısına start verilib. III dövrənin ilk matçı Qəbələdə baş tutub. 2017-ci ildə ilk rəsmi sınağına çıxan “Qəbələ” “Sumqayıt”ı qəbul edib. “Qırmızı-qaralar” XV turun görüşünə qələbə iddiası ilə başlayıb. Bunadək evdə keçirdiyi bütün qarşılaşmalarda “Gənclik şəhəri” təmsilçisini məğlub edən komandamız ilk dəqiqələrdən üstünlüyü ələ alıb. Matça kəşfiyyatsız başlayan “Qəbələ” hakimin start fiti ilə rəqib qapısına həmlələrə start verib. Artıq 5-ci dəqiqədə futbolçularımız ardıcıl 2 dəfə qola yaxın olub. Qonaqların qapıçısı öncə Filip Ozobiçin cərimə meydanının xətti üzərindən zərbəsini, ardınca Sergey Zenyovun qapıçı meydanından vurduğu zərbəni dəf edib. Fəal oyunu ilə rəqibi müdafiəyə qapanmağa vadar edən komandamız 9-cu dəqiqədə də təhlükəli epizod yaradıb. Sağ cinahda fəal mübarizə aparan Tellur Mütəllimovun qapı önünə asması qolkiperlə müdafiəçi arasında anlaşılmazlıqla yekunlaşıb. Lakin bundan yararlanmaq mümkün olmayıb. İlk yarıda Ruslan Qurbanov da iki dəfə diqqət mərkəzinə düşüb. Öncə yaxın məsafədən qapını nişan alan hücumçu ardınca 11 metrlik nöqtə yaxınlığından baş zərbəsi endirib. Hər iki halda top dirəyin yanından keçib. Tellur və Rikardinyonun qapı istiqamətində endirdikləri yaddaqalan zərbələr də hesabın açılması üçün yetərli olmayıb. Müdafiəyə çəkilən qonaqlar isə yalnız ilk yarının sonlarında nisbətən fəallaşaraq bir neçə hücum təşkil edib.
İkinci hissəyə də “Qəbələ” daha fəal başlayıb. Lakin “qırmızı-qaralar” qonaqların müdafiə səddini yarmaqda bir müddət çətinlik çəkib. “Sumqayıt” əks-hücum zamanı hesabı açıb. Sergey Çenışovun ötürməsindən sonra topla cərimə meydanınadək irəliləyən Məhəmməd Qurbanov hesabı açıb – 0:1. Buraxılan qoldan sonra təzyiqi artıran “Qəbələ” hesabda tarazlığı bərpa etməyi bacarıb. Nika Kvekveskirinin künc zərbəsindən sonra cərimə meydanının xətti üzərindən qapını nişan alan Ozobiçin göndərdiyi top Vitali Verniduba düşüb. Ukraynalı müdafiəçi qapı önündə topu saxlayaraq qarşısıalınmaz zərbə endirib – 1:1. Bu qol onun “qırmızı-qara” formada 3-cü uğuru olub. Az keçməmiş Nikanın təhlükəli aşırma zərbəsi yaddaqalan olub. Ozobiçin təxminən 20 metrdən endirdiyi cərimə zərbəsinin qarşısını isə qapıçı alıb. Ümumiyyətlə qonaqların qapıçı və müdafiəçiləri dəfələrlə futbolçularımızın fərqlənməsinin qarşısını son anda alıb. Teo Uiksi ardınca Araz Abdullayevlə Cavid Hüseynovu da meydana buraxan Roman Qriqorçuk hücum xəttinə güc əlavə edib. “Qəbələ”də ilk rəsmi oyununa çıxan Abdullayev klub tarixinə 212-ci futbolçu kimi düşüb. Lakin “qırmızı-qaralar” qələbə qolunu vurmağa müvəffəq olmayıb. Düzdür, Arazın üç zərbəsi yaddaqalan olub. Lakin bir dəfə qapıçı, bir dəfə müdafiəçilər, digər epizodda isə qeyri-dəqiqlik ona mane olub. Sumqayıtlılar ilk yarıda olduğu kimi matçın sonlarında da bir neçə sürətli əks-hücum təşkil etməyi bacarıb.
Beləliklə, “Qəbələ” mövsümün ikinci yarısına 1:1 hesablı sülhlə başlayıb.
“Qəbələ”
22. Dmitri Bezotosnı
6. Rəşad Sadiqov (k)
(14.Cavid Hüseynov, 82)
7. Nika Kvekveskiri
(27. Teo Uiks, 62)
9. Sergey Zenyov
10. Ruslan Qurbanov
(77. Araz Abdullayev, 78)
11. Asif Məmmədov
15. Vitali Vernidub
19. Filip Ozobiç
20. Rikardinyo
34. Urfan Abbasov
88. Tellur Mütəllimov
Ehtiyat oyunçular:
33. David Pietrzkeviç
17. Məhəmməd Mirzəbəyov
18. Baqali Dabo
21. Roman Hüseynov
Baş məşqçi: Roman Qriqorçuk
“Sumqayıt”
1. Fərhad Vəliyev
2. Rail Məlikov
3. Vurğun Hüseynov (k)
8. Nicat Muxtarov
10. Məhəmməd Qurbanov
14. Bəxtiyar Həsənalızadə
19. Azər Salahlı
22. Mirabdulla Abbasov
(9. Amil Yunanov, 75)
42. Kamran Abdullazadə
97. Xəyal Nəcəfov
(21. Nasır Abilayev, 79)
20. Fərhad Qıstarov
(7. Sergey Çernışev, 46)
Ehtiyat oyunçular:
94. Tərlan Əhmədli
5. Seymur Əsədov
18. Süleyman Əhmədov
76. Bayram Nuruzadə
Baş məşqçi: Samir Abasov
