"Sumqayıt" - "Qəbələ" 1:1
18 dekabr 2014. Saat 15:00. “Kapital Bank Arena”, 1500 tamaşaçı
Baş hakim: Rəhim Həsənov
Baş hakimin köməkçiləri: Rəvan Həmzəzadə, Rza Məmmədov,
Dördüncü hakim: İnqilab Məmmədov
AFFA nümayəndəsi: Mübariz Hüseynov
Hakim-inspektor: Murad Məmmədov
Sarı vərəqələr: Aleksandr Çertoqanov, 33 (qeyri-idman hərəkəti); Tofiq Mikayılov, 80 (qeyri-idman hərəkəti); Məhəmməd Qurbanov, 86 (hakimin qərarına etiraz); Tərzin Cahangirov, 89 (hakimin qərarına etiraz); Orxan Əliyev, 90+1 (qeyri-idman hərəkəti) // Adrian Ropotan, 63 (qeyri-idman hərəkəti)
Qollar: Məhəmməd Qurbanov, 67 // Cavid Hüseynov, 86 (p.)
Artırılan vaxt: I hissədə - yoxdur.; II hissədə 4 dəq.
Bu gün Topaz Premyer Liqasında XVII turun oyunları keçirilib. 2014-cü ildə son səfər matçına çıxan “Qəbələ” “Sumqayıt”ın qonağı olub. “Gənclik şəhəri” təmsilçisi ilə əvvəlki 9 qarşılaşmada 8 qələbə qazanıb, yalnız 1 dəfə məğlub olan “qırmızı-qaralar” bu dəfə də matça 3 xal iddiası ilə çıxıb. Komandanın məşqçisi Sənan Qurbanov ötən turun “Qarabağ”la oyunu ilə müqayisədə start heyətində bir dəyişiklik edib. Cəzası başa çatan Cavid Hüseynov yenidən “11-lik”də yer alıb. Əvəzində Markinyoş ehtiyatda qalıb. Son oyunlarda mərkəz müdafiəçisi kimi çıxış edən Ruslan Abışov yenə arxa xətdə yer alıb. Pavol Farkaş isə ehtiyat oyunçular skamyasında qalıb.
Sumqayıtdakı oyun güclü küləklə müşayiət olunub ki, bu da matça təsir edib. Hər iki komandanın futbolçuları belə küləkdə çıxış etməkdən əziyyət çəkiblər. Ötürmələrə təsir edən külək hər iki komandada dəqiqliyin aşağı olmasına səbəb olub. Matça gəlincə isə ilk yarıda meydan sahibləri daha fəal olub. Sumqayıtlılar bir neçə təhlükəli epizod yaratsa da, Kamran Ağayev etibarlı oyunu ilə qola imkan verməyib. “Qəbələ”nin ilk yarıdakı ən yaddaqalan epizodu isə 32-ci dəqiqədə yaranıb. Komandanın heyətində ən yaxşılardan olan Ekiqonun zərbəsini rəqib qapıçı çətinliklə dəf edib. Topa özünü yetirməyə çalışan Dodo isə rəqiblərini qabaqlaya bilməyib. Az sonra taktiki dəyişiklik edən Sənan Qurbanov hücumda yer alan Bəxtiyar Soltanovla sağ cinahdakı Cavid Hüseynovun yerini dəyişib. Sonuncu elə matç başa çatanadək ön xətdə mübarizə aparıb.
İkinci hissədə “Qəbələ” xeyli fəallaşsa da, hesabı meydan sahibləri açıb. Süni oyundankənar vəziyyət yaratmaq istəyən “qırmızı-qaralar”ın arxa xətdəki xətası Məhəmməd Qurbanovun fərqlənməsi ilə nəticələnib. Ardınca qonaqlar böyük qüvvə ilə irəli atılıb. Bu komandaya iki futbolçunun zədələnməsi bahasına başa gəlib. Hücum zamanı xəsarət alan Dodo başına sarğı qoyulduqdan sonra yenidən meydana dönüb və komandasına kömək etməyə çalışıb. Müdafiəçi Rafael Santos isə zədə səbəbindən əvəzlənməli olub. “Qəbələ”nin qol vurmaq səyləri görüşün sonlarında bəhrəsini verib. Meydana sonradan daxil olan Markinyoşun ötürməsindən sonra topa yiyələnən Dodo Aleksandr Çertoqanovla mübarizədə penalti qazanıb. Əvvəlki oyunlarda da 11 metrlik cərimə zərbələrini yerinə yetirən Cavid Hüseynov yenə dəqiq olub – 1:1. Bundan sonra Yazalde Pintonu da meydana buraxan Qurbanov qələbə üçün son şansdan da yararlanıb. Lakin son dəqiqələr hesabı dəyişməyib.
Beləliklə, “Sumqayıt”la oyunlarda ilk dəfə heç-heçə edən “Qəbələ” aktivindəki xalların sayını 18-ə çatdırıb.
“Sumqayıt”
1. Andrey Popoviç
3. Vurğun Hüseynov
5. Cəmil Hacıyev
7. Ruslan Poladov (k)
9. Orxan Əliyev
10. Tərzin Cahangirov
14. Məhəmməd Qurbanov
(2. Slavik Alxasov, 71)
15. Nodar Məmmədov
18. Aleksandr Çertoqanov
22. Tofiq Mikayılov
(96. Budaq Nəsirov, 81)
92. Bəxtiyar Həsənalızadə
Ehtiyat oyunçular:
63. Şahruddin Məhəmmədəliyev
11. Kiyan Sultanpur
17. Ramazan Abbasov
77. Təvəkkül Məmmədov
86. Fərid Quliyev
Baş məşqçi: Aqil Məmmədov
“Qəbələ”
1. Kamran Ağayev (k)
4. Elvin Camalov
(8. Markus Kunya, 75)
5. Sadiq Quliyev
10. Dodo
(21. Yazalde Pinto, 89)
14. Cavid Hüseynov
15. Ruslan Abışov
25. Adrian Ropotan
27. Bəxtiyar Soltanov
34. Urfan Abbasov
44. Rafael Santos
(26. Pavol Farkaş, 73)
90. Ekiqo Ehiosun
Ehtiyat oyunçular:
30. Anar Nəzirov
13. Murad Musayev
16. Ruslan Tağızadə
99. Tellur Mütəllimov
Məşqçi: Sənan Qurbanov
