“Sumqayıt” – “Qəbələ” – 0:1
14 oktyabr 2017. Saat 18:00. “Kapital Bank Arena”, 1300 tamaşaçı
Baş hakim: Rauf Cabbarov
Baş hakimin köməkçiləri: Elman Musayev, Nahid Əliyev
Dördüncü hakim: İnqilab Məmmədov
AFFA nümayəndəsi: Sakin Məmmədzadə
Hakim-inspektor: Əhmədağa Cabbarov
Sarı vərəqələr: Rail Məlikov, 37 (qeyri-idman hərəkəti); Bəxtiyar Həsənalızadə, 54 (qeyri-idman hərəkəti) // Endi Hallidey, 43 (qeyri-idman hərəkəti); Asif Məmmədov, 80 (oyunun bərpasını ləngitdiyinə görə); Dmitri Bezotosnı, 88 (oyunun bərpasını ləngitdiyinə görə)
Qol: Famoussa Kone, 29
Artırılan vaxt: I hissədə 1 dəq.; II hissədə 4 dəq.
Bu gün Topaz Premyer Liqasında VIII turun növbəti oyunları keçirilib. “Qəbələ” II dövrədəki ilk matçında “Sumqayıt”la qarşılaşıb. “Qırmızı-qaralar” milli komandaların oyunları ilə əlaqədar yaranan fasilədən sonrakı ilk görüşünü səfərdə keçirib. Baş məşqçi Roman Qriqorçuk I dövrənin son oyunu ilə müqayisədə start heyətində bir sıra dəyişikliklər edib. “Kəpəz”lə ev matçının iştirakçılarından Vojislav Stankoviç, Elvin Məmmədov, Ruslan Qurbanov, Asif Məmmədov və Vitali Vernidub bu dəfə “11-lik”dən kənar qalıb. Ukraynalı mütəxəssis bu dəfə Rasim Ramaldanov, Endi Hallidey, Famoussa Kone, Tellur Mütəllimov və Ekiqo Ehiosuna şans verib.
Oyun qarşılıqlı hücumlarla başlasa da, meydan sahibləri cüzi ərazi üstünlüyünü ələ alıb. Lakin “qırmızı-qaralar” tezliklə bərabərlik yarada bilib. Sağ cinahda fəallıq göstərən Baqali Dabonun qapı önünə ötürmələrindən biri yaddaqalan olub. Amma sumqayıtlılar topu uzaqlaşdırmağı bacarıb. Az sonra qapıçı meydanı yaxınlığında topa yiyələnən Cavid Hüseynovun zərbəsi alınmayıb. Famoussa Konenin yaxın məsafədən zərbəsini isə qolkiper tutub. Dmitri Bezotosnı da ustalığını göstərməyə imkan tapıb. O, topu rəqib futbolçunun ayaqlarından götürə bilib. 29-cu dəqiqədə isə hesab açılıb. Qapıçı ilə təkbətək çıxan Kone rəqibin büdrəyib yıxılmasından yararlanıb. İrəliləyən hücumçu topu nəzarətsiz qalan qapıya göndərib – 1:0. Bu, legionerin “Qəbələ” formasında ilk qolu olub. Buraxılan qoldan sonra “Sumqayıt” futbolçuları irəli atılıb. Bundan yararlanan komandamız fərqi artırmağa yaxın olub. Amma Dabo əlverişli vəziyyətdən istifadə edə bilməyib. Rəqib isə Rəşad Eyyubovun təhlükəli cərimə zərbəsi ilə diqqət çəkib. Top dirəyin yanından ötüb.
İkinci hissə Sumqayıt təmsilçisinin üstünlüyü şəraitində keçib. Məğlubiyyətdən qaçmaq üçün böyük qüvvə ilə irəli atılan meydan sahibləri ardıcıl hücumlar təşkil edib. “Qəbələ” isə hücuma aludə olan rəqibi əks-həmlələrdə yaxalamağa çalışıb. Sol cinahda daha fəal olan “Sumqayıt”ın hava ötürmələri təhlükəli alınsa da, başla qapıya vurulan zərbələri dəf etmək Bezotosnı üçün çətinlik yaratmayıb. Oyunda dönüş yaratmağa çalışan Qriqorçuk Asif Məmmədovla Ruslan Qurbanovu meydana buraxıb. Buna baxmayaraq, qarşılaşma meydan sahiblərinin hücumları ilə başa çatıb.
Beləliklə, “Qəbələ” mövsümdə 5-ci qələbəsini qazanıb və xal hesabını 16-ya çatdırıb.
“Sumqayıt”
1. Fərhad Vəliyev
2. Rail Məlikov
(11. Ehtiram Şahverdiyev, 64)
3. Vurğun Hüseynov (k)
5. Vüqar Bəybalayev
(7. Cavid Tağıyev, 32)
9. Amil Yunanov
10. Cavid İmamverdiyev
14. Bəxtiyar Həsənalızadə
18. Tural Axundov
19. Azər Salahlı
32. Rəşad Eyubov
97. Xəyal Nəcəfov
Ehtiyat oyunçular:
23. Mehdi Cənnətov
6. Kamal Mirzəyev
17. Fərid Kərimzadə
39. Tural Bayramlı
71. Ramazan Həsənov
Baş məşqçi: Samir Abasov
“Qəbələ”
22. Dmitri Bezotosnı
5. Rasim Ramaldanov
8. Qismət Alıyev
9. Baqali Dabo
12. Endi Hallidey
14. Cavid Hüseynov (k)
(11. Asif Məmmədov, 68)
16. Dion Omar Malone
34. Ürfan Abbasov
45. Famoussa Kone
(10. Ruslan Qurbanov, 79)
88. Tellur Mütəllimov
90. Ekiqo Ehiosun
Ehtiyat oyunçular:
23. Aqil Məmmədov
35. Murad Popov
4. Elvin Camalov
6. Elvin Məmmədov
7. Alen Akserov
17. Roman Hüseynov
28. Hacıağa Hacıyev
32. Amin Seydiyev
70. Ülvi İsgəndərov
Baş məşqçi: Roman Qriqorçuk
