“Qəbələ” - “Lill” (Fransa) - 1:0
UEFA Avropa Liqası, III təsnifat mərhələsi, cavab oyunu
4 avqust. Saat 21:00. Bakı. “Bakcell Arena” stadionu
Baş hakim: Aleksey Yeskov (Rusiya)
Baş hakimin köməkçiləri: Dmitri Mosyaqin, İqor Demeşko (hər ikisi Rusiya)
Dördüncü hakim: Vladimir Moskalev (Rusiya)
Hakim-inspektor: Oleq Çuykin (Belarus)
UEFA nümayəndəsi: Vasko Dojçinovski (Makedoniya)
Qol: Filip Ozobiç, 34
Sarı vərəqələr: Nika Kvekveskiri, 44, Asif Məmmədov, 90+4//Morqan Amalfitano, 26, Yunus Sankare, 87
Artırılan vaxt: I hissədə 1 dəq.; II hissədə 4 dəq.
İlk oyun – 1:1
“Qəbələ” UEFA Avropa Liqasında növbəti oyununu keçirib. “Qırmızı-qaralar” III təsnifat mərhələsinin cavab oyununda Fransanın “Lill” klubunu qəbul edib. Səfərdə 1:1 hesablı heç-heçəyə nail olan Roman Qriqorçukun yetirmələri pley-offa yüksəlmək üçün mübarizə aparıb. Ukraynalı mütəxəssis ötən həftə keçirilən matçla müqayisədə start heyətində heç bir dəyişiklik etməyib. Fransa təmsilçisi isə Lilldəki qarşılaşmada ilk “11-lik”də olmayan İbrahim Amadu, həmçinin Adama Soumaoro və Ederə şans verib. Əvəzində kapitan Rio Mavuba, Rayan Mendeş və Marko Başa start heyətdən kənarda qalıb.
Qarşılıqlı hücumlarla başlayan görüşün ilk yarısında komandalar qol vəziyyətləri yaratmaqda çətinlik çəkib. “Qəbələ” Rikardinyonun sol cinahdan qapı önünə yerlə ötürməsi zamanı qonaqlara gərginlik yaşadıb. Qapıçı və müdafiəçilərin anlaşılmazlığından yararlanan olmayıb. Qonaqların sol cinahla hücumundan sonra uzaq küncün yaxınlığından Ederin baş zərbəsi yaddaqalan, amma qeyri-dəqiq olub. “Lill” topa nəzarəti ələ alsa da, Dmitri Bezotosnını narahat etməkdə çətinlik çəkib. Munir Obbadinin uzaq zərbəsi diqqət çəksə də, dəqiq olmayıb. 34-cü dəqiqədə isə hesab açılıb. Teo Uiksdən ötürmə alan Filip Ozobiç təxminən 23 metrdən qapını dəqiq nişan alıb – 1:0. Xorvatiyalı “Qəbələ”də 2-ci qolunu vurub. Bundan sonra qonaqlar təzyiqi artırmağa çalışsa da, “qırmızı-qaralar”ın əks-hücumları daha təhlükəli alınıb. Xüsusilə Baqali Dabonun ön xətdəki fəallığı diqqət çəkib. Onun Rəşad Sadiqovla divar paslaşmasının qapıya zərbə ilə nəticələnməsinə isə sön ötürmədəki qeyri-dəqiqlik mane olub.
Eyni ssenari ilə davam edən ikinci yarıda da ilk təhlükəni “Qəbələ” yaradıb. Dabonun ötürməsindən sonra Sergey Zenyovun fərqlənməsinə onu qabaqlayan qapıçı mane olub. “Lill” isə uzaq zərbələri ilə qol vurmağa çalışıb. Sebastyan Korçianın sağ cinahdan qapıya ünvanlandığı topu Bezotosnı ikinci cəhddən tutub. Obbadinin zərbəsi zamanı müdafiəçilərə çarpıb, istiqamətini dəyişən topun da qarşısını qolkiper alıb. “Qırmızı-qaralar”ın cavabı isə Sadiqovla gəlib. Kapitanın 25 metrdən qapını nişan almaq cəhdində dəqiqlik çatmayıb. İlk yarıdakı kimi topa nəzarət edə bilməyən fransalılar oyunçu dəyişiklikləri ilə matçın axarını lehinə çevirməyə çalışıb. Lakin inamlı oyun nümayiş etdirən “Qəbələ” nəinki qonaqların qol imkanı yaratmasına imkan verib, hətta özü hesabı artırmağa yaxın olub. Son dəqiqələrdə əks-hücum zamanı Sadiqovdan ötürmə alan Asif Məmmədov müdafiəçidən sıyrılıb, qapıçı ilə üz-üzə qalsa da, uzaq küncə ünvanlanan topu qapıçı dəf edib.
Beləliklə, 1:0 hesabı ilə qalib gələn “Qəbələ” avrokuboklardakı ardıcıl 3-cü ev qələbəsini qazanıb. “Böyük beşlik” ölkəsi klubu üzərində qələbə qazanan ilk Azərbaycan klubu kimi tarixə düşən “qırmızı-qaralar” ardıcıl 2-ci dəfə UEFA Avropa Liqasının pley-offuna yüksəlib. Qriqorçukun yetirmələri həm də cari mövsümün ardıcıl 6-cı oyununda da meydanı qolsuz tərk etməyib.
“Qəbələ”
22. Dmitri Bezotosnı
3. Vojislav Stankoviç
6. Rəşad Sadiqov (k)
7. Nika Kvekveskiri
9. Sergey Zenyov
15. Vitali Vernidub
17. Məhəmməd Mirzəbəyov
18. Baqali Dabo
19. Filip Ozobiç
(11. Asif Məmmədov, 77)
20. Rikardinyo
27. Teo Uiks
Ehtiyat oyunçular:
33. David Pietrzkeviç
4. Elvin Camalov
13. Murad Musayev
32. Rəşad Eyyubov
34. Ürfan Abbasov
44. Rafael Santos
Baş məşqçi: Roman Qriqorçuk
“Lill”
1. Vinsent Enyeama
2. Sebastyan Korçia
5. Renato Çivelli (k)
6. İbrahim Amadu
8. Munir Obbadi
(4. Yunus Sankare, 64)
10. Morqan Amalfitano
(9. Yassin Benzia, 73)
11. Erik Bautok
(20. Rayan Mendeş, 64)
12. Yulian Palmieri
17. Markos Lopes
19. Eder
23. Adama Soumaoro
Ehtiyat oyunçular:
16. Mayk Malqnan
13. Stoppila Sunzu
18. Frank Beria
24. Rio Mavuba
Baş məşqçi: Frederik Antonetti
