“Maribor” (Sloveniya) – “Qəbələ” – 1:0
UEFA Avropa Liqası, pley-off mərhələsi, cavab oyunu
25 avqust. Saat 22:15. Maribor. “Lyudski Vrt” stadionu
Baş hakim: Viktor Kaşşai (Macarıstan)
Baş hakimin köməkçiləri: Qyorgi Rinq, Vençel Tot (hər ikisi Macarıstan)
Dördüncü hakim: Tamaş Boqnar (Macarıstan)
Hakim-isnpektor: İqor İşenko (Ukrayna)
UEFA nümayəndəsi: Kris Bonet (Malta)
Qol: Markos Tavares, 66
Sarı vərəqələr: Erik Yanza, 49, Aleks Pihler, 60, Denis Sme, 65, Marvan Kabha, 67 // Vitali Vernidub, 38, Asif Məmmədov, 87, Filip Ozobiç, 89
Qırmızı vərəqə: Teo Uiks, 69
Artırılan vaxt: I hissədə 0 dəq.; II hissədə 6 dəq.
İlk oyun – 1:3
“Qəbələ” bu gün növbəti avrokubok matçını keçirib. Ardıcıl ikinci mövsüm UEFA Avropa Liqasının pley-off mərhələsində çıxış edən “qırmızı-qaralar” cavab oyununda Sloveniyanın “Maribor” klubu ilə üz-üzə gəlib. Ötən həftə Bakıda keçirilən qarşılaşmada 3:1 hesabı ilə qalib gələn Roman Qriqorçukun yetirmələri səfər matçına üstünlüyünü qoruyub, bir il əvvəlki kimi qrupda oynamaq iddiası ilə çıxıb. Baş məşqçi avqustun 18-də baş tutan görüşlə müqayisədə start heyətində heç bir dəyişiklik etməyib.
Oyun “Maribor”un ardıcıl hücumları ilə başlayıb. İlk dəqiqələrdən üstünlüyü ələ almağa çalışan meydan sahibləri topa nəzarət etsə də, “Qəbələ”nin müdafiə səddini yarmaqda çətinlik çəkib. Komandamız isə daha təhlükəli epizod yaratmağa nail olub. Topu rəqibdən “oğurlayan” Teo Uiksdən ötürmə alan Filip Ozobiç cərimə meydanına daxil olaraq, yaxın küncü nişan alıb. Sloveniyalıları qoldan Yasmin Handanoviçin reaksiyası xilas edib. “Maribor” futbolçuları isə ilk yarı ərzində bir neçə dəfə cərimə meydanında əlverişli mövqeyə çıxmağa yaxın olub. Lakin müdafiəçilərin etibarlı oyunu təhlükənin böyüməsinə imkan verməyib. Bir neçə epizodda isə Vojislav Stankoviçin inamlı oyunu rəqibin hücumunu dayandırıb. 45 dəqiqə ərzində bir neçə dəfə oyuna daxil olan Dmitri Bezotosnı da səhvsiz çıxışları ilə diqqət çəkib.
İkinci hissəyə “Qəbələ” daha fəal başlayıb. Fasilədən sonra böyük qüvvə ilə irəli atılan “qırmızı-qaralar” ardıcıl hücumlar təşkil edib. İlk 10 dəqiqədə bir neçə dəfə çərçivəni nişan alan futbolçularımızın zərbələrinin önünə atılan sloveniyalılar topun qarşısını kəsib. Xüsusilə də Ozobiçin qüvvətli zərbələri yaddaqalan olub. Bunlardan birində top “Maribor” futbolçusunun əlinə dəysə də, hakim matçı dayandırmayıb. Ardınca meydan sahibləri oyunda tarazlıq yaradıb və tərəflər qarşılıqlı hücumlar təşkil edib. Bezotosnı Damyan Boharın zərbəsini zərərsizləşdiribsə, Məhəmməd Mirzəbəyovun irəli şığıyıb, cərimə meydanına daxil olmaq istədiyi anda onu kobudluqla dayandırıblar. 66-cı dəqiqədə sloveniyalılar oyunun taleyini həll edən qola imza atıb. Markos Tavaresin 24 metrdən qüvvətli zərbəsi “doqquzluğ”a düşüb – 1:0. Qoldan 3 dəqiqə sonra qırmızı vərəqə alan Uiks komandamızı azlıqda qoyub. Say üstünlüyü qazanan “Maribor” təzyiqi daha da artırıb. “Qəbələ”yə sürətli əks-hücum imkanı verməyən mariborlular ardıcıl həmlələr təşkil etsə də, müdafiəçilər səhvə yol verməyib. Meydan sahibləri bir neçə dəfə müdafiə xəttini yarmağı bacarsa da, Bezotosnı hesabın dəyişməsinə mane olub. Hətta epizodların birində qolkiper qapı xəttinin üstündən qaytarmaqla “qırmızı-qaralar”ı qoldan xilas edib. Məhz onun inamlı oyunu ümumi hesabın “Maribor”un xeyrinə dəyişməsinə mane olub. Uzatma dəqiqələrində də mübariz keyfiyyətlərini nümayiş etdirən “Qəbələ” hesabı qorumağı bacarıb.
Beləliklə, iki oyunun ümumi nəticəsinə görə (3:2) qalib gələn “Qəbələ” ardıcıl 2-ci mövsüm UEFA Avropa Liqasının qrup mərhələsində çıxış edəcək. “Qırmızı-qaraıar”ın buradakı rəqibləri avqustun 26-da Monakoda keçiriləcək püşkatmada müəyyənləşəcək. Tədbir Bakı vaxtı ilə saat 15:00-da başlayacaq.
“Maribor”
33. Yasmin Handanoviç
3. Erik Yanza
4. Marko Şuler
5. Blaz Vrhoveç
(24. Marvan Kabha, 46)
6. Aleks Pihler
(8. Sintayehu Solelix, 63)
9. Markos Tavares (k)
11. Milivoye Novakoviç
22. Dare Vrişiç
35. Rodriqo Defendi
(20. Qreqor Bayde, 65)
39. Damyan Bohar
44. Denis Sme
Ehtiyat oyunçular:
69. Matko Obradoviç
14. Sanni Omoreqi
28. Mitya Viler
70. Aleş Mertelj
Baş məşqçi: Darko Milaniç
“Qəbələ”
22. Dmitri Bezotosnı
3. Vojislav Stankoviç
7. Nika Kvekveskiri
9. Sergey Zenyov
(11. Asif Məmmədov, 86)
15. Viatli Vernidub
17. Məhəmməd Mirzəbəyov
18. Baqali Dabo
(32. Rəşad Eyubov, 90+6)
19. Filip Ozobiç
20. Rikardinyo
27. Teo Uiks
44. Rafael Santos (k)
Ehtiyat oyunçular:
33. David Pietrzkieviç
4. Elvin Camalov
6. Rəşad Sadiqov
13. Murad Musayev
34. Ürfan Abbasov
Baş məşqçi: Roman Qriqorçuk
