“Qəbələ” – “Neftçi” – 1:2
4 mart 2018. Saat 15:30. Qəbələ şəhər stadionu, 3000 tamaşaçı
Baş hakim: Rauf Cabbarov
Baş hakimin köməkçiləri: Vaqif Musayev, Vüqar Bayramov
Dördüncü hakim: Ömər Paşayev
AFFA nümayəndəsi: Şaiq Həmidov
Hakim-inspektor: Füzuli Nəcəfov
Sarı vərəqələr: Baqali Dabo, 38 (hakim qərarına etiraz); Elvin Camalov, 56 (qeyri-idman hərəkəti); Voislav Stankoviç, 88 (qeyri-idman hərəkəti) // Rəhman Hacıyev, 19 (hakimi aldatmağa cəhd); Emin Mahmudov, 76 (qeyri-idman hərəkəti); Kiril Petrov, 87 (qeyri-idman hərəkəti); Anton Krivotsyuk, 90+1 (qeyri-idman hərəkəti)
Qırmızı vərəqə: Yusif Nəbiyev, 83 (rəqibi aşkar qol vurmaq imkanından məhrum etdiyinə görə)
Qollar: Elvin Məmmədov, 34 // Mirabdulla Abbasov, 59; İqnasio Herrera, 73
Artırılan vaxt: I hissədə 1 dəq.; II hissədə 4 dəq.
Bu gün Topaz Premyer Liqasında XVIII tura start verilib. Turun ilk qarşılaşması Qəbələ şəhər stadionunda keçirilib. “Qəbələ” öz meydanında “Neftçi”ni qəbul edib. “Qırmızı-qaralar” matça ötən turun “Səbail”lə görüşü ilə müqayisədə start heyətində 4 dəyişikliklə başlayıb. Baş məşqçi Roman Qriqorçuk Elvin Camalov, Elvin Məmmədov, Famussa Kone və Yusif Nəbiyevə ilk dəqiqələrdən şans verib. Əvəzində Asif Məmmədov, Stiven Monroz, Hacıağa Hacıyev və Təmkin Xəlilzadə “11-lik”dən kənarda qalıb.
Oyunun ilk dəqiqələri qarşılıqlı hücumlarla yadda qalıb. Tezliklə ərazi üstünlüyünə yiyələnən “Qəbələ” daha çox hücumlar təşkil edib. Lakin müdafiəyə qapanmaq fikrində olmayan paytaxt klubu da ön xətdə də fəallıq nümayiş etdirib. Komandaların səylərinə baxmayaraq, matçın ilk yarım saatı qapılar önündə təhlükəli vəziyyət yaranmayıb. 31-ci dəqiqədə “Neftçi”nin yarımmüdafiəçisi Namiq Ələsgərovun irəliləyib, cərimə meydanı yaxınlığından endirdiyi zərbə yaddaqalan olub. Top qapı tirinə tuş gəlib. “Qırmızı-qaralar”ın cavabı 2 dəqiqə sonraya təsadüf edib. Filip Ozobiçin sol cinaha ötürməsindən sonra topu saxlamadan qapı önünə göndərən Yusif Nəbiyev hesabın açılmasında pay sahibi olub. Rəqib müdafiəçi ilə mübarizədə Baqali Dabo topa toxuna bilməsə də, Elvin Məmmədov təxminən 10 metrdən dəqiq zərbə ilə fərqlənib – 1:0. Qoldan sonra da matçın axarı dəyişməyib. Rəqiblər real qol vəziyyəti yaratmadan hücumlar təşkil ediblər.
Matçın ikinci hissəsinə hər iki komanda fəal başlayıb. Öncə Filip Ozobiçin cərimə zərbəsi təhlükəli alınıb. Lakin qapı önündəki oyunçulardan heç biri topu qapıya istiqamətləndirə bilməyib. Famussa Konenin də qapıya endirdiyi zərbə yaddaqalan olsa da, dəqiqliyi ilə seçilməyib. “Neftçi” isə hissənin əvvəlində bərabərlik qoluna imza atıb. Müdafiədəki səhvdən yararlanan bakılılar Mirabdulla Abbasovun qolu ilə hesabda tarazlıq yaradıb. Buraxılan qoldan sonra “qırmızı-qaralar” hücumlarının sayını artırsa da, real qol vəziyyəti yaratmaqda çətinlik çəkib. Qonaqlar isə sürətli əks-hücum zamanı İqnasio Herreranın qolu ilə hesabda önə keçiblər. Roman Qriqorçukun əvəzetmələrlə oyuna müdaxilə etmək cəhdləri də nəticəsiz qalıb. Ardıcıl hücumlar təşkil edən komandamız “Neftçi”yə əks həmlələr üçün imkan yaradıb. Belə vəziyyətlərin birində Rəhman Hacıyevi qaydalar çərçivəsindən kənar yolla dayandıran Yusif Nəbiyev sonuncu ümid foluna görə qırmızı vərəqə alıb. Azlıqda qalan “Qəbələ” məğlubiyyətdən qurtulmaq üçün hücumlarını davam etdirib. Görüşün son saniyələrində Filip Ozobiçin cərimə meydanı xaricindən zərbəsində isə az dəqiqlik çatmayıb.
Beləliklə, “Qəbələ” ilk yarıdakı üstünlüyü qoruya bilməyib və ev oyununda 1:2 hesabı ilə məğlub olub.
“Qəbələ”
22. Dmitri Bezotosnı
3. Voislav Stankoviç
4. Elvin Camalov
(16. Omar Malone, 84)
9. Baqali Dabo
10. Ruslan Qurbanov
6. Elvin Məmmədov
(33. Təmkin Xəlilzadə, 67)
15. Vitali Vernidub
(18. İlqar Qurbanov, 78)
19. Filip Ozobiç
34. Urfan Abbasov (k)
45. Famussa Kone
74. Yusif Nəbiyev
Ehtiyat oyunçular:
23. Aqil Məmmədov
35. Murad Popov
5. Rasim Ramaldanov
77. Samir Qurbanov
29. Hacıağa Hacıyev
32. Amin Seydiyev
62. Faiq Hacıyev
72. Kamran Quliyev
Baş məşqçi: Roman Qriqorçuk
“Neftçi”
94. Rəşad Əzizli
15. Ruslan Abışov (k)
2. İlkin Qırtımov
25. Kiril Petrov
5. Anton Krivotsyuk
8. Emin Mahmudov
10. Derlis Meza Kolli
7. Namiq Ələsgərov
17. Rəhman Hacıyev
(12. Mayk Kampaz, 86)
11. İqnasio Herrera
22. Mirabdulla Abbasov
(9. Lukas Qomes, 80)
Ehtiyat oyunçular:
1. Səlahət Ağayev
20. Elnur Süleymanov
26. Ömər Buludov
3. Fərid Abbaslı
77. Elvin Sərkərov
Baş məşqçi: Tərlan Əhmədov
