“Xəzər Lənkəran” – “Qəbələ” – 0:1
06 dekabr 2015. Saat 16:00. “Xəzər Lənkəran” mərkəzi stadionu, 1500 tamaşaçı
Baş hakim: Ömər Paşayev
Baş hakimin köməkçiləri: Yaşar Abbasov, Akif Əmirəli
Dördüncü hakim: Vaqif Musayev
Əlavə köməkçi hakimlər: İnqilab Məmmədov, Ramil Əhmədov
AFFA nümayəndəsi: Əsgər Əmirəliyev
Hakim-inspektor: Şahin Cəfərov
Sarı vərəqələr: İlyas Səfərzadə, 61 (qeyri-idman hərəkəti) // Elvin Camalov, 49 (qeyri-idman hərəkəti); Rafael Santos, 53 (qeyri-idman hərəkəti)
Qollar: Aleksey Antonov, 20
Artırılan vaxt: I hissədə 2 dəq.; II hissədə 3 dəq.
Bu gün Topaz Premyer Liqasında XV tura start verilib. “Qəbələ” səfərdə “Xəzər Lənkəran”la qarşılaşıb. I dövrədə rəqibini 6:0 hesabı ilə məğlub edən “qırmızı-qaralar” səfər matçına da 3 xal üçün çıxıb. Bu matçadək çempionatda ardıcıl 3 heç-heçə edən komandamızın start heyətində son turun qarşılaşması ilə müqayisədə 4 dəyişiklik baş verib. Dmitri Bezotosnı, Ermin Zets, Vaqif Cavadov və Ruslan Abışov “11-lik”dən kənarda qalıb. Əvəzində baş məşqçi Roman Qriqorçuk Andrey Popoviç, Rəşad Sadiqov, Dodo və Fakundo Pereyra ilk dəqiqələrdən meydanda olublar. Dekabrın 4-də Azərbaycan Respublikası Dövlət Neft Şirkətinin (SOCAR) “Günəşli” yatağındakı 10 saylı dərin dəniz özülündə baş vermiş yanğın və qəza ilə əlaqədar hər iki komanda matça neftçi dəbilqələri və qara sarğı ilə çıxıb və oyun 1 dəqiqəlik sükutla başlayıb. Görüşə daha fəal başlayan “Qəbələ” ilk dəqiqələrdən hücumlara start verib. Üstünlüyə yiyələnən komandamız meydan sahiblərinin qapısı önündə bir neçə real qol vəziyyəti yarada bilib. Rəqib qapısına təzyiqi artıran komandamız bu azsaylı təhlükəli epizodların birində hesabı açıb. Aleksey Antonov meydan sahiblərinin qapısına yol tapıb. Ukraynalı hücumçu çempionatdakı qol sayını 6-ya çatdırıb. Antonov Premyer Liqanın bombardirləri siyahısında liderlərə şərik olub. Bu qoldan sonra meydan sahibləri fəallaşsa da, “qırmızı-qaralar” rəqibin qarşısını almaqla yanaşı, öz hücumlarını da davam etdirib. Antonov bir neçə dəfə dublunu rəsmiləşdirməyə yaxın olsa da, fərqi artıra bilməyib. “Xəzər Lənkəran”ın qol vurmasına isə qapı dirəyi mane olub. Belə ki, Rahid Əmirquıiyevin güclü zərbəsi dirəkdən dönüb. Görüşün ikinci yarısında da oyunun ssenarisi eyni olub. “Qəbələ” hesabı artırmaq üçün hücumlar təşkil edib, meydan sahibləri isə bərabərlik qolunu vurmağa çalışıb. Amma hər iki komandanın səylərinə baxmayaraq, qapılar önündə real qol vəziyyətləri yaranmayıb. Baş məşqçilərin əvəzetmələr sayəsində hücumların kəsərini artırmaq istəyi də nəticəsiz qalıb. Samir Zərgərovla Derlis Meza Kollinin meydana daxil olmasından sonra da lənkəranlıların qapısında real qol vəziyyəti yaranmayıb. Bununla da Antonovun qolu matçda yeganə olub. Beləliklə, “Qəbələ” Premyer Liqadakı 6 oyundan ibarət qələbəsiz seriyanı Lənkəranda qırıb. Mövsümdə 7-ci qələbəsini qazanan “qırmızı-qaralar” 2-ci pilləyə yüksəlib.
“Xəzər Lənkəran”
1. Orxan Sadıqlı
12. İlyas Səfərzadə
(79. Namiq Qocayev, 78)
14. Rahid Əmirquliyev (k)
16. İbrahim Qədirzadə
18. Tural Cəlilov
32. Zaman Mirzəzadə
41. Hüseyn Xəlilzadə
42. Kamran Abdullazadə
(77. Əli Əliyev, 83)
72. Elvin Mirzəyev
97. Elnur Cəfərov
(5. Fərid Əsədov, 85)
99. Mahsum Qəmbərli
Ehtiyat oyunçular:
25. Tərlan Qasımzadə
Baş məşqçi: Yunis Hüseynov
“Qəbələ”
1. Andrey Popoviç
4. Elvin Camalov
6. Rəşad Sadiqov
(66. Samir Zərgərov, 73)
8. Məhəmməd Mirzəbəyov
9. Sergey Zenyov
10. Dodo (k)
19. Aleksey Qay
21. Arif Daşdəmirov
32. Fakundo Pereyra
(88. Derlis Meza Kolli, 73)
44. Rafael Santos
69. Aleksey Antonov
Ehtiyat oyunçular:
33. David Pietrzkeviç
7. Ermin Zets
25. Qismət Alıyev
34. Ürfan Abbasov
87. Ruslan Abışov
Baş məşqçi: Roman Qriqorçuk
