“Qəbələ” – “Zirə” – 2:1
Klesio Bauk (2) // Soni Norde
“Qəbələ” yoxlama oyunu keçirib. Milli komandaların qarşılaşmaları ilə əlaqədar Azərbaycan Premyer Liqasında yaranan fasilə dövründə hazırlığını davam etdirən “qırmızı-qaralar” “Zirə” ilə üz-üzə gəlib. Matç Bakı Olimpiya Stadionunun ehtiyat meydançasında baş tutub. Komandamızın çalışdırıcısı Elmar Baxşıyev aşağıdakı start heyətinə şans verib: Tərlan Əhmədli, İviça Zuniç, Sadiq Quliyev, Qismət Alıyev, Yusif Nəbiyev, Asif Məmmədov, Fernan Lopez, Klesio Bauk, Ülvi İsgəndərov, Kristian Kuaku, Roman Hüseynov.
Qarşılıqlı hücumlarla keçən matçın ilk yarısı qolsuz başa çatıb. Fasilədən sonra Merab Qiqauri, Davit Volkov və Murad Musayev oyuna daxil olublar. Məhsuldar keçən ikinci hissənin əvvəlində Klesio Bauk hesabı açıb. Az keçməmiş mozambikli yarımmüdafiəçi rəqib qapısına daha bir dəfə yol tapıb. “Zirə” bu toplardan birinin əvəzini çıxa bilib. Baxşıyev matçın sonlarında daha iki futbolçu – Vüsal Məsimovla Rüstəm Nuruyevə də şans verib.
Beləliklə, “Qəbələ” “Zirə” ilə yoxlama oyununda 2:1 hesabı ilə qalib gəlib.
