PAOK (Saloniki, Yunanıstan) - “Qəbələ” – 0:0
UEFA Avropa Liqası, qrup mərhələsi, C qrupu, V tur
26 noyabr. Saat 00:05. Saloniki. “Tumba” stadionu
Baş hakim: Yakob Kehlet (Danimarka)
Baş hakimin köməkçiləri: Henrik Larsen, Lars Riks (hər ikisi Danimarka)
Əlavə köməkçi hakimlər: Mads-Kristoffer Kristoffersen, Peter Kyesqard-Andersen (hər ikisi Danimarka)
Dördüncü hakim: Lars Hummelqard (Danimarka)
UEFA nümayəndəsi: Kris Bellon (Belçika)
Hakim-inspektor: Uilyam Yanq (Şotlandiya)
Artırılan vaxt: I hissədə 1 dəq.; II hissədə 4 dəq.
UEFA Avropa Liqasında V turun oyunları keçirilib. C qrupunda mübarizə aparan “Qəbələ” Yunanıstanda PAOK-la qarşılaşıb. Bu qrupun daha tez keçirilən oyununda “Krasnodar” Rusiyada Almaniya təmsilçisi “Borussiya”nı (Dortmund) məğlub etdiyindən 1/16 finala hər iki vəsiqənin sahibi bəlli olub. Salonikidəki matç isə 3-cü yer baxımından əhəmiyyət kəsb edib. Avrokuboklarda özünün 15-ci qarşılaşmasına çıxan “qırmızı-qaralar” meydana indiyədək uduzmadığı Yunanıstan təmsilçiləri ilə qarşılaşmalardakı seriyanı davam etdirmək iddiası ilə çıxıb. Baş məşqçi Roman Qriqorçuk son avrokubok matçı ilə müqayisədə start heyətində 4 dəyişiklik edib. Zədədən sonra heyətə dönən Dmitri Bezotosnı qapıda David Piertzkieviçi əvəzləyib. Ermin Zets, Samir Zərgərov və Rəşad Sadiqov da ilk “11-lik”də yer alıb. Əvəzində Dodo, Vitali Vernidub və Derlis Meza Kolli start heyətindən kənar qalıb. Dodonun yoxluğunda kapitan sarğısı da Sadiqova verilib.
Salonikidə oyun qarşılıqlı hücumlarla başlayıb. Rəqib qapısına həmlələr təşkil edən komandalar qapılar qarşısında real qol vəziyyəti yaratmaqda çətinlik çəkib. “Qəbələ”nin hücumlarından biri zamanı Zets topa yiyələnib, qapıçı ilə təkbətək çıxmağa yaxın olub. Lakin hakimin oyundankənar vəziyyət qərarı bosniyalının qarşısını alıb. Ardınca sağ cinahdan ötürmə alan Aleksey Antonovun 11 metrlik nöqtənin yaxınlığından endirdiyi güclü zərbəni qapıçı dəf edib. Ukraynalı hücumçu bir neçə dəqiqə sonra da əlverişli mövqeyə çıxmağa yaxın olub. Lakin o qapıçı meydanı istiqamətində ötürməyə çatmayıb. PAOK-un hücumlarının qarşısını isə “qırmızı-qaralar”ın müdafiəçiləri inamla alıb. Bir neçə dəfə isə Bezotosnı etibarlı oynayıb. İlk yarının sonlarında hər iki komandanın qapısı önündə təhlükə yaranıb. PAOK-un künc zərbəsindən sonra “Qəbələ”nin müdafiə xəttində anlaşılmazlıq yaransa da, sonda topa qapıçı yiyələnib. Ardınca isə rəqib cərimə meydanında topa sahib olan Zərgərovun zərbəsi alınmayıb.
İkinci hissədə də cüzi üstünlüyə malik meydan sahiblərinin 19 metrdən yerinə yetirdiyi cərimə zərbəsi təhlükəli olsa da, top canlı səddə dəyib. Aleksey Qayın cavab zərbəsi daha yaddaqalan olub. Lakin rəqib qolkiper onun qapıya göndərdiyi topu zərərsizləşdirib. Salonikililərin hesabı açmağa yaxın olduğu epizodda isə Sabo Berbatovun ötürməsini dəqiq tamamlaya bilməyib. Rikardinyo ilə Zenyovun cinahda ötürmələrlə irəlilədiyi epizodda isə sonuncunun qapı önünə göndərdiyi topa qolkiper sahib çıxıb. Makın yaxın məsafədən zərbəsindən sonra Bezotosnı əlindən buraxdığı topu ikinci cəhddən tutub. Sürətlə irəliləyən Antonovun başladığı hücumu dəqiq zərbəylə tamamlayan olmayıb. Rikardinyonun sağ cinahdan yerinə yetirdiyi cərimə zərbəsi zamanı da hava ötürməsinə heç kim toxunmayıb. Matçın sonlarında Zets fərqlənməyə yaxın olub. Cavadovun cinah ötürməsindən sonra qapıçını qabaqlayan bosniyalının zərbəsi dəqiq alınmayıb.
Beləliklə, qarşılaşma 0:0 hesabı ilə başa çatıb ki, bu da “Qəbələ”nin Yunanıstan klubları ilə görüşlərdə 4-cü heç-heçəsidir.
PAOK
71. Panagiotis Qlikos
2. Yannis Skondras
13. Stelios Malezas
31. Giorgios Tsavellas
70. Stelios Kitsiou
(33. Stefanos Atanasiadis, 78)
6. Aleksandros Tsiolis (k)
11. Robert Mak
24. Qari Rodriges
10. Dimitar Berbatov
(27. Yannis Mistakidis, 71)
26. Erqis Katse
77. Dimitris Pelkas
(52. Erik Sabo, 46)
Ehtiyat oyunçular:
25. Robin Olsen
4. Marin Leovaç
9. Jairo da Silva
16. Qoyko Kimirot
Baş məşqçi: İqor Tudor
"Qəbələ"
22. Dmitri Bezotosnı
3. Voyislav Stankoviç
20. Rikardinyo
21. Arif Daşdəmirov
66. Samir Zərgərov
(8. Məhəmməd Mirzəbəyov, 83)
7. Ermin Zets
9. Sergey Zenyov
(70. Vaqif Cavadov, 77)
69. Aleksey Antonov
44. Rafael
19. Aleksey Qay
6. Rəşad Sadiqov (k)
(4. Elvin Camalov, 87)
Ehtiyat oyunçular:
33. David Pietrikeviç
88. Derlis Meza Kolli
15. Vitali Vernidub
34. Ürfan Abbasov
Baş məşqçi: Roman Qriqorçuk
