“Zirə” – “Qəbələ” – 0:2
25 sentyabr 2016. Saat 18:00. Zirə İdman Kompleksinin stadionu, 800 tamaşaçı
Baş hakim: Rəvan Həmzəzadə
Baş hakimin köməkçiləri: Elman Musayev, Nahid Əliyev
Dördüncü hakim: Namiq Hüseynov
Əlavə köməkçi hakimlər: Əliyar Ağayev, Fariz Yusifov
AFFA nümayəndəsi: Eldar Qasımov
Hakim-inspektor: Şaiq Həmidov
Sarı vərəqələr: Adil Nağıyev, 66 (qeyri-idman hərəkəti) // Vojislav Stankoviç, 3 (qeyri-idman hərəkəti); Asif Məmmədov, 30 (qeyri-idman hərəkəti); Petar Franyiç, 65 (qeyri-idman hərəkəti)
Qollar: Teo Uiks, 19;76
Artırılan vaxt: I hissədə 1 dəq.; II hissədə 4 dəq.
Bu gün Topaz Premyer Liqasında VI turun növbəti oyunları keçirilib. Mövsümdə 2-ci səfər oyununu keçirən “Qəbələ” “Zirə”nin qonağı olub. Bu turadək çempionatın lideri olan “qırmızı-qaralar” matça bir gün əvvəl əldən verdiyi zirvəni qaytarmaq iddiası ilə çıxıb. Baş məşqçi Roman Qriqorçuk “Sumqayıt”la təxirə salınan oyunla müqayisədə start heyətində 5 dəyişiklik edib. Bu dəfə Vojislav Stankoviç, Elvin Camalov, Sergey Zenyov, Məhəmməd Mirzəbəyov və Filip Ozobiçə güvənən ukraynalı mütəxəssis Rəşad Sadiqov, Ruslan Qurbanov, Baqali Dabo, Rikardinyo və Rafael Santosa istirahət verib. Sadiqovun yoxluğunda kapitan sarğısı Məmmədovda olub.
“Qəbələ” oyuna özünəxas tərzdə başlayıb. Son matçlarında olduğu kimi bu dəfə də üstünlüyə yiyələnən “qırmızı-qaralar” topa nəzarəti ələ alıb. Meydan sahibləri isə ilk dəqiqələrdən sürətli əks-hücumlara üstünlük verib. Matçda hesab 19-cu dəqiqədə açılıb. Ozobiçin cərimə meydanına gözəl ötürməsini əlverişli mövqedə olan Teo Uiks qola çevirib. Liberiyalı üz-üzə qaldığı rəqib qolkiperə şans verməyib. Bu, onun ölkə çempionatında ilk qolu olub. Hesab açıldıqdan sonra görüş qarşılıqlı hücumlar şəraitində davam edib. Zenyovun cərimə meydanına reydi qeyri-dəqiq zərbə ilə nəticələnib. Az sonra Ozobiçin qüvvətli zərbəsindən sonra top qapının yanından keçib. Meydan sahiblərinin bərabərlik qolu vurmağa yaxın olduğu epizodda isə dirək son 7 oyunda qol buraxmayan Dmitri Bezotosnının köməyinə gəlib. Ümumiyyətlə, qoldan sonra xeyli fəallaşan paytaxt təmsilçisi ardıcıl hücumlar təşkil edib. Lakin qapıçı və müdafiəçilərin inamlı oyunu hesabın dəyişməsinə imkan verməyib.
İkinci hissə də oxşar ssenari ilə davam edib. Meydan sahibləri daha sürətli oynayıb, hesabda tarazlıq yaratmağa çalışıbsa, “Qəbələ” daha çox mövqe hücumlarına üstünlük verib. 57-ci dəqiqədə Uiks ideal ötürmə ilə Zenyovu qapıçı ilə üz-üzə çıxarıb. Lakin estoniyalı topa toxunsa da, hesabı dəyişə bilməyib. Legioner 1 dəqiqə sonra iti bucaq altında təkbətək çıxdığı qapıçını məyus etməyə çalışıb. Lakin özünü yetirən müdafiəçilər ona mane olublar. Meydana sonradan daxil olan çempionatın ən yaxşı bombardiri Dabo fərqi artırmaq imkanı əldə edib. O, qapıçı ilə təkbətək çıxdığı epizodda çərçivəni tərk edən qolkiperin başı üzərindən zərbə endirib. Lakin zərbəyə cüzi dəqiqlik çatmayıb. Üstəlik, özünü yetirən müdafiəçi topu uzaqlaşdırıb. Bundan sonra da daha fəal təsir bağışlayan meydan sahibləri hesabda tarazlıq yaratmaq üçün hücumlarını davam etdirib. Hesabı isə “Qəbələ” dəyişib. Teo Uiksin uzaq zərbəsi dəqiq olub – 2:0. Bu, liberiyalının Premyer Liqada ilk dublu olub. “Qəbələ” daha bir dəfə azarkeşlərini sevindirməyə yaxın olsa da, rəqib qolkiperin gözəl qurtarışı buna imkan verməyib.
Beləliklə, “Qəbələ” ardıcıl 4-cü qələbəsini qazanıb. Turnir cədvəlinin 1-ci pilləsində qərarlaşan “qırmızı-qaralar” ardıcıl 8-ci çempionat oyununda da qapısını toxunulmaz saxlayıb. Bununla da Dmitri Bezotosnının “quru” seriyası 778 dəqiqəyə çatıb.
“Zirə”
1. Anar Nəzirov
23. Yovan Krneta
44. Migel Lorenso
28. Təmkin Xəlilzadə
5. Adil Nağıyev
6. Vüqar Mustafayev
8. Milan Duriç
11. Viktor İqbekoyi
(20. Sezar Meza Kolli, 73)
10. Elvin Məmmədov (k)
(17. Vüsal İsgəndərli, 81)
7. Gerhard Proqni
(21. Murad Səttarlı, 88)
19. Nurlan Novruzov
Ehtiyat oyunçular:
85. Kamal Bayramov
13. Aleksandr Şemonayev
96. Elgün Nəbiyev
18. Tural Cəlilov
Baş məşqçi: Adil Şükürov
“Qəbələ”
22. Dmitri Bezotosnı
3. Vojislav Stankoviç
4. Elvin Camalov
9. Sergey Zenyov
(18. Baqali Dabo, 60)
11. Asif Məmmədov (k)
(6. Rəşad Sadiqov, 82)
13. Murad Musayev
17. Məhəmməd Mirzəbəyov
19. Filip Ozobiç
(10. Ruslan Qurbanov, 68)
27. Teo Uiks
30. Petar Franyiç
34. Ürfan Abbasov
Ehtiyat oyunçular:
33. David Pietrzikeviç
15. Vitali Vernidub
21. Roman Hüseynov
88. Tellur Mütəllimov
Baş məşqçi: Roman Qriqorçuk
