“Qəbələ” – “İnter” 1:1
16 may 2015. Saat 20:00. Qəbələ şəhər stadionu, 3000 tamaşaçı
Baş hakim: Fariz Yusifov
Baş hakimin köməkçiləri: Vaqif Musayev, Azər Əsgərov
Dördüncü hakim: Munis Abdullayev
AFFA nümayəndəsi: Məmmədəli Məmmədov
Hakim-inspektor: Xaqani Məmmədov
Sarı vərəqələr: Rəşad Sadiqov, 74 (qeyri-idman hərəkəti) // Aleksandr Amisulaşvili, 53 (rəqibi tutduğuna görə); Derlis Meza Kolli, 75 (qeyri-idman hərəkəti)
Qollar: Aleksey Qay, 5 // Asif Məmmədov, 27
Artırılan vaxt: I hissədə - yoxdur.; II hissədə 4 dəq.
Bu gün Topaz Premyer Liqasında XXXIV tura yekun vurulub. “Qəbələ” öz meydanında “İnter”i qəbul edib. Ardıcıl 10 çempionat matçında uduzmayan “qırmızı-qaralar” ötən turla müqayisədə matça iki dəyişikliklə başlayıb. Cəzalı Ruslan Abışovla yanaşı, Ekiqo Ehiosun da ilk “11-lik”dən kənarda qalıb. Əvəzində Mixail Sivakov və cari mövsüm komandanın ən yaxşı bombardiri olan Cavid Hüseynov ilk dəqiqələrdən meydana çıxıb. Cəzalı Abışovun yoxluğunda kapitan sarğısı da Hüseynova verilib.
Meydana qələbə üçün çıxan Roman Qriqorçukun yetirmələri artıq 5-ci dəqiqədə hesabı açıb. Erkən qolun müəllifi Aleksey Qay olub. Viktor Mendidən ötürmə alan ukraynalı yarımmüdafiəçi cərimə meydanının daxilindən qarşısıalınmaz zərbə vurub. Qoldan sonra qonaqlar fəallaşsa da, azarkeşlər qarşılıqlı hücumlara şahid olublar. “Qırmızı-qaralar”ın hücumları daha təhlükəli alınıb. Künc zərbəsi zamanı yaşanan gərginlik zamanı qonaqların qapıçısı komandasını xilas edib. Hüseynovun cinah ötürməsindən sonra Mixail Sivakovun baş zərbəsində dəqiqlik çatmayıb. Qarşılaşmanın 27-ci dəqiqəsində qonaqlar hesabı bərabərləşdirməyə nail olub. Coşqun Diniyevin sol cinahdan ötürməsindən sonra müdafiə xəttindəki anlaşılmazlıqdan yararlanan Asif Məmmədov qapıçı ilə üz-üzə qalıb, dəqiq zərbə ilə hesabda tarazlıq yaradıb. Hesab bərabərləşdikdən sonra komandalar hücumlar təşkil etsə də, qapılar önündə ciddi təhlükə yarada bilməyib. Hissənin sonlarında Mendinin sürətlə cərimə meydanına daxil olması yaddaqalan olub. Lakin onun qapı önünə ötürmə etməsinə rəqib müdafiəçiləri imkan verməyib.
İkinci hissəyə “Qəbələ” daha fəal başlayıb. İlk 5 dəqiqədə qonaqların qapısı önündə 2 təhlükə yaranıb. Əvvəl Elvin Camalovun cərimə meydanı xaricindən vurduğu güclü zərbəni rəqib qapıçı dəf edib. Cərimə meydanına daxil olan Mendinin zərbəsindən sonra isə top qapıdan yan keçib. Bundan sonra çempionluq şansını itirməmək üçün “İnter” irəli atılıb. Amma “qırmızı-qaralar” sürətli hücumlarla rəqibin üstünlüyə yiyələnməsinə imkan verməyib. Qarşılaşmanın ikinci yarısı Elvin Camalovun zədələnməsi ilə diqqət çəkib. Coşqun Diniyevlə mübarizədə zədələnən dayaq yarımmüdafiəçisi oyunu davam etdirə bilmədiyindən əvəzlənib. Matçın sonlarında hücumların kəsərini artırmaq niyyətində olan Qriqorçuk Ekiqo Ehiosunu da meydana buraxıb. Bundan sonra ərazi üstünlüyü “Qəbələ”nin tərəfinə keçib. Hər iki cinahla həmlələr təşkil edən “qırmızı-qaralar” 88-ci dəqiqədə qola yaxın olub. Lakin Rəşad Sadiqovun ötürməsindən sonra Ekiqo hücumu zərbə ilə tamamlaya bilməyib.
Beləliklə, məğlubiyyətsiz oyunlar seriyasını 11-ə çatdıran “Qəbələ” ardıcıl 2-ci ev oyununda 1:1 hesablı heç-hecəyə nail olub. “Qırmızı-qaralar” XXXII turda “Qarabağ”la Qəbələdəki görüşdə eyni nəticəyə imza atmışdı.
“Qəbələ”
22. Dmitri Bezotosnı
4. Elvin Camalov
(5. Sadiq Quliyev, 77)
6. Rəşad Sadiqov
14. Cavid Hüseynov (k)
19. Aleksey Qay
20. Rikardinyo
27. Bəxtiyar Soltanov
32. Mixael Sivakov
34. Ürfan Abbasov
44. Rafael Santos
9. Viktor Mendi
(90. Ekiqo Ehiosun, 83)
Ehtiyat oyunçular:
30. Anar Nəzirov
17. Qismət Alıyev
18. Ruslan Fomin
26. Pavol Farkaş
97. Roman Hüseynov
Baş məşqçi: Roman Qriqorçuk
“İnter”
1. Giorgi Lomaya (k)
5. Aleksandr Amisulaşvili
8. Mikel Alvaro
(15. Yohan Bokanyano, 46)
10. Elvin Məmmədov
11. Asif Məmmədov
(22. Əfran İsmayılov, 56)
17. Məhəmməd Mirzəbəyov
21. Arif Daşdəmirov
23. Vojislav Stankoviç
28. Baçana Sxadadze
(19. Sezar Meza Kolli, 70)
88. Derlis Meza Kolli
91. Coşqun Diniyev
Ehtiyat oyunçular:
96. Elşən Poladov
7. Abdulla Abatsiyev
13. Mirsahib Abbasov
33. Matiya Şpiçiç
Baş məşqçi: Kaxaber Sxadadze
