“Qəbələ” – “Neftçi” – 2:2
01 may 2016. Saat 16:30. Qəbələ şəhər stadionu, 1500 tamaşaçı
Baş hakim: Rauf Cabbarov
Baş hakimin köməkçiləri: Nahid Əliyev, Munis Abdullayev
Dördüncü hakim: Ramil Əhmədov
AFFA nümayəndəsi: Maşallah Əhmədov
Hakim-inspektor: Füzuli Nəcəfov
Sarı vərəqələr: Məhəmməd Mirzəbəyov, 87 (rəqibi tutduğuna görə); Ermin Zets, 90 (qeyri-idman hərəkəti) // Rahil Məmmədov, 10 (bilərəkdən əl ilə oynadığına görə); Ruslan Qurbanov, 16 (qeyri-idman hərəkəti)
Qollar: Aleksey Qay, 21-p.; Rəşad Sadiqov, 51 // Ruslan Qurbanov, 32; Elşən Abdullayev, 64
Artırılan vaxt: I hissədə 1 dəq.; II hissədə 3 dəq.
Bu gün Topaz Premyer Liqasında XXXII turun oyunları keçirilib. “Qəbələ” öz meydanında “Neftçi”ni qəbul edib. Son iki çempionat matçında qələbə qazanan “qırmızı-qaralar” paytaxt təmsilçisi ilə matça da 3 xal iddiası ilə çıxıb. 4 gün öncə bu rəqiblə Azərbaycan kubokunun yarımfinalında üz-üzə gələn komandamız bu dəfə görüşə fərqli heyətlə çıxıb. Belə ki, baş məşqçi Roman Qriqorçuk start heyətində 6 dəyişikliyi zəruri sayıb. Bu dəfə Pavel Paşayev, Məhəmməd Mirzəbəyov, Arif Daşdəmirov, Qismət Alıyev, Rəşad Eyyubov və Rafael Santos ilk dəqiqələrdən meydana daxil olub. Əvəzində Elvin Camalov, Asif Məmmədov, Samir Zərgərov, Rikardinyo, Vitali Vernidub və Ürfan Abbasov “11-lik”dən kənarda qalıb.
Qarşılıqlı hücumlarla başlayan matçda ilk təhlükəli epizod qonaqların qapısı önündə yaranıb. Sağ cinahdan uzun ötürməni cərimə meydanında qəbul edən Daşdərmirov onu daha əlverişli mövqedə olan Eyyubova göndərib. Lakin 10 metrdən zərbə endirən sonuncu çərçivəyə düşə bilməyib. Komandamızın növbəti hücumu qolla nəticələnib. Belə ki, soldan cərimə meydanına daxil olan Aleksey Antonova qarşı kobudluğa görə təyin edilən penaltini Aleksey Qay dəqiq yerinə yetirib. Ardıcıl 3-cü matçda hesabı açan yarımmüdafiəçi çempionatda 9-cu, “Qəbələ” karyerasında 17-ci qoluna imza atıb. “Qırmızı-qaralar” artıq növbəti hücum zamanı fərqi də artırmağa yaxın olub. Lakin Mirzəbəyovun ötürməsindən sonra çərçivəni dəqiq nişan alan Antonovun zərbəsinin qolla nəticələnməsinə özünü yetirən Jairo Rodriges mane olub. “Neftçi”nin braziliyalı legioneri hesabda tarazlıq yaratmaq imkanı da əldə edib. Künc zərbəsindən sonra onun qüvvətli baş zərbəsini Dmitri Bezotosnı qaytarmaqla hesabın dəyişməsinə əngəl olub. Matçın 33-cü dəqiqəsində paytaxt təmsilçisi bərabərlik qolu vurub. Aylton Silvadan ötürmə alan Ruslan Qurbanov 21 metrdən uzaq “doqquzluğ”u dəqiq nişan alıb. Bundan sonra rəqib qapısına təzyiqi artıran “Qəbələ” fasiləyədək daha 3 qol imkanı əldə edib. Antonovun qapıçı meydanının kənarından endirdiyi baş zərbəsi qapıçıdan küncə çıxıb. Eyyubov isə Daşdərmirovun ötürməsini 8 metrdən tirdən yuxarı vurub. Bir neçə dəqiqə sonra Qayın ötürməsini qapıçı meydanının yaxınlığından qolkiperin üstünə vurub.
İkinci hissədə də oyunun ssenarisi dəyişməyib. Komandalar qarşılıqlı hücumlar təşkil etdiyindən hər iki qapı önündə təhlükəli epizodlar yaranıb. Hissənin əvvəlində Daşdəmirovun cərimə zərbəsindən sonra komanda yoldaşının başla ötürməsinə yiyələnən Rəşad Sadiqov “Qəbələ”ni hesabda önə çıxarıb. Bu, yarımmüdafiəçinin komandamızda 2-ci qolu olub. Az keçməmiş “Neftçi” yenidən hesabı bərabərləşdirib. Elşən Abdullayev cərimə meydanının xətti üzərindən dəqiq zərbə endirib. Asif Məmmədov və Ermin Zetsi, ardınca isə Samir Zərgərovu meydana buraxıb, ön xətti daha da gücləndirən Qriqorçukun addımı özünü doğruldub. “Qırmızı-qaralar” ardıcıl bir neçə təhlükəli hücum təşkil edib. Bunların birində Qay fərqlənsə də, oyundankənar vəziyyət qeydə alınıb. Məqsəd İsayevin zərbəsindən sonra qonaqların hesabda önə keçməsinə isə qapı tiri mane olub. Bundan sonra da hər iki komanda rəqib qapısına həmlələr təşkil etsə də, hesab dəyişməyib – 2:2.
“Qəbələ”
22. Dmitri Bezotosnı
3. Voislav Stankoviç
5. Pavel Paşayev
(66. Samir Zərgərov, 46)
6. Rəşad Sadiqov (k)
8. Məhəmməd Mirzəbəyov
19. Aleksey Qay
21. Arif Daşdəmirov
25. Qismət Alıyev
32. Rəşad Eyubov
(11. Asif Məmmədov, 46)
44. Rafael Santos
69. Aleksey Antonov
(7. Ermin Zets, 72)
Ehtiyat oyunçular:
33. David Pietrzkeviç
4. Elvin Camalov
15. Vitali Vernidub
34. Urfan Abbasov
Baş məşqçi: Roman Qriqorçuk
“Neftçi”
1. Aqil Məmmədov (k)
3. Jairo Filyo Rodriges
6. Aylton Silva
(7. Araz Abdullayev, 69)
4. Rahil Məmmədov
8. Elşən Abdullayev
11. Ruslan Qurbanov
(20. Salas Quinta Antonio, 89)
15. Erik Ramos
17. Rəhman Hacıyev
(10. Cavid İmamverdiyev, 82)
19. Fəhmin Muradbəyli
27. Məqsəd İsayev
95. Elvin Bədəlov
Ehtiyat oyunçular:
53. Maksim Vaylo
26. Kamal Qurbanov
14. Məhəmməd Qurbanov
18. Elşən Rzazadə
Baş məşqçi: Vəli Qasımov
