Rəqibimizi tanıyaq
Xəbərlər / 23 İyun 2014 | 15:36227
Tarixində ilk dəfə 2014-2015 mövsümündə UEFA Avropa Liqasında debüt edəcək "Qəbələ"nin ilk rəqibi müəyyənləşib. Komandamız ilkin təsnifat mərhələsində Bosniya və Herseqovina təmsilçisi "Şiroki Briyeq"lə qarşılaşacaq. Komandamız ilk oyunu evdə - iyulun 3-də keçirəcək. Cavab görüşü isə iyulun 10-da səfərdə baş tutacaq.
"Qırmızı-qaralar" ilkin mərhələni uğurla adlasa, növbəti etapda - ikinci təsnifat mərhələsində Çexiyanın "Mlada Boleslav" kollektivi ilə qarşılaşacaq.
1948-ci ildə yaranan “Şiroki Briyeq”in uğurları Bosniya və Herseqovina müstəqillik əldə edəndən sonrakı dövrə təsadüf edib. Yuqoslaviyanın parçalanmasından sonra Şiroki Briyeqi təmsil edən eyniadlı klub daxili arenada uğur qazanıb. 2 dəfə ölkə çempionu (2003/04, 2005/06) olan komanda ötən mövsümü 2-ci pillədə başa vurmaqla tarixinin 5-ci (2001/02, 2007/08, 2009/10, 2011/12, 2013/14) gümüş medalını qazanıb. 2007 və 2013-cü illərdə isə “Şiroki Briyeq” ölkə kubokunu əldə edib.
Ev oyunlarını 8 min tamaşaçı tutan “Petsara” stadionunda keçirən komanda avrokuboklarda 2002/03 mövsümündə debüt edib. 12-ci dəfə qitə miqyaslı turnirdə çıxış edəcək komandanın ən böyük uğuru 2005/06 mövsümündə təsadüf edib. Həmin vaxt Bosniya və Herseqovina təmsilçisi UEFA kubokunda 2 mərhələ adlayıb. 2004/05 mövsümündə isə bu komandanın Çempionlar Liqasındakı debütü Azərbaycan çempionu “Neftçi” ilə duelə təsadüf edib. Bakı klubu səfər qolu ilə (1:2, 1:0) mərhələ adlayıb. Slaven Musanın baş məşqçisi olduğu komanda son mövsümdə II təsnifat mərhələsindən mübarizəyə qoşulduğu Avropa Liqasında Qazaxıstan “İrtış”ını keçsə də (2:0, 2:3), İtaliya “Udineze”si qarşısında aciz qalmışdı – 1:3, 0:4.
"Qırmızı-qaralar" balkanlıları mübarizədən kənarlaşdırsa, 1902-ci ildə əsası qoyulan Çexiya təmsilçisi ilə görüşəcək. 112 yaşlı klubun bütün uğurları son 10 ilə təsadüf edib. 2004-cü ildə Çexiya çempionatının yüksək liqasında oynamaq hüququ qazanan mlada boleslavlılar 3 dəfə mükafatçılar sırasına düşüb. 2005/06 mövsümündə gümüş, 2006/07 və 2013/14 mövsümlərində bürünc medal qazanan komanda 2011-ci ildə Çexiya kubokunu başı üzərinə qaldırıb. Avrokuboklarda 2006/07 mövsümündə debüt edən komanda ardıcıl 2 dəfə (2006/07 və 2007/08) UEFA kubokunun qrup mərhələsində çıxış edib. 2013/14 mövsümündə isə “Mlada Boleslav” qitə kuboklarına qatılmayıb. Ev oyunlarını 5 min tamaşaçı tutan “Mestski” stadionunda keçirən klubu Karel Yarolim çalışdırır.
OXŞAR XƏBƏRLƏR
