“Qəbələ”nin futbolçusu Samir Zərgərov “qırmızı-qara” formada 100-cü oyununu keçirəcək. 29 yaşlı yarımmüdafiəçi Topaz Premyer Liqasının “Kəpəz”lə oktyabrın 31-də keçiriləcək qarşılaşmasında meydana çıxsa, yubiley oyununu qeyd edəcək.
2006-2009-cu illərdə “Qəbələ”də çıxış edib, 2015-ci ilin yayında komandamıza qayıdan Zərgərov indiyədək 99 matçda “qırmızı-qaralar”ın sıralarında olub. O, bu oyunların 78-ni Premyer Liqada, 15-ni ölkə kubokunda, 6-nı UEFA Avropa Liqasında keçirib.
Samir klub tarixində 100 və daha çox oyun keçirən 4-cü futbolçu olacaq. Ona qədər Dodo (147 oyun), Viktor Mendi (127 oyun) və Ürfan Abbasov (111 oyun) buna nail olublar. Hazırda 99 oyun keçirən Pavel Doroşevlə birlikdə 4-cü göstəriciyə malik Zərgərovun hesabında 12 qol var. Yarımmüdafiəçi klub tarixinin ən yaxşı bombardirləri siyahısında 9-11-ci yerləri bölən 3 futbolçudan biridir.
“Qəbələ”nin oyunlarında 5 dəfə penalti zərbəsi yerinə yetirib, bunların 3-də qol vuran Samir kubok matçında penaltilər seriyasında da qapını dəqiq nişan alıb.
Xatırladaq ki, yarımmüdafiəçi komandamızda ilk oyununu 2006-cı il avqustun 5-də keçirib. O, “qırmızı-qaralar” Premyer Liqada keçirdiyi ilk qarşılaşmada “İnter”ə qarşı 90 dəqiqə forma geyinib.
| Mövsüm | Turnir | Oyun | Dəqiqə | Qol | Sarı | Qırmızı |
| 2006/07 | Premyer Liqa | 21 | 1507 | 1 | 4 | 0 |
| 2006/07 | Kubok | 4 | 144 | 1 | 0 | 0 |
| 2007/08 | Premyer Liqa | 24 | 1258 | 3 | 8 | 0 |
| 2007/08 | Kubok | 7 | 418 | 2 | 0 | 0 |
| 2008/09 | Premyer Liqa | 24 | 1504 | 3 | 4 | 0 |
| 2008/09 | Kubok | 4 | 216 | 0 | 1 | 0 |
| 2015/16 | UEFA Avopa Liqası | 6 | 176 | 0 | 1 | 0 |
| 2015/16 | Premyer Liqa | 9 | 650 | 2 | 2 | 0 |
| 2015/16 | CƏMİ | 99 | 5873 | 12 | 20 | 0 |
