“Panatinaikos” (Yunanıstan) – “Qəbələ” – 2:2
UEFA Avropa Liqası, pley-off mərhələsi, cavab oyunu
27 avqust. Saat 23:00. Afina. Apostolos Nikolaidis stadionu
Baş hakim: İvan Krujilak (Slovakiya)
Baş hakimin köməkçiləri: Tomas Somolani, Tomas Mokoş (hər ikisi Slovakiya)
Dördüncü hakim: Peter Kraloviç (Slovakiya)
Hakim inspektor: Manuel Mexuto Qonzales (İspaniya)
UEFA nümayəndəsi: Volfqanq Tiyerixter (Avstriya)
Sarı vərəqələr: Vitali Vernidub, 39, Markus Berq, 40, Zeka, 52, Aleksey Qay, 63, Nano, 73, Rikardinyo, 78, Statis Tavlaridis, 90+1
Qollar: Dodo, 6, 60, Markus Berq, 35, Nano, 78
Artırılan vaxt: I hissəyə 1 dəq.; II hissəyə 4 dəq.
İlk oyun – 0:0
UEFA Avropa Liqasında pley-off mərhələsinin cavab oyunları keçirilib. Avrokuboklarda yubiley – 10-cu matçına çıxan “Qəbələ” səfərdə Yunanıstanın “Panatinaikos” klubu ilə qarşılaşıb. Bir həftə əvvəl keçirilən ilk oyunla müqayisədə komandamız qarşılaşmaya bir dəyişikliklə başlayıb. Cəzalı Rafael Santosun əvəzinə mərkəz müdafiəçisi mövqeyində Vitali Vernidub yer alıb.
Oyun meydan sahiblərinin hücumları ilə başlayıb. Afina təmsilçisinin ilk hücumlarından birində hesabın açılmasına qapı dirəyi mane olub. Cərimə meydanı xaricindən Sotiris Ninisin qüvvətli zərbəsi dirəyə tuş gəlib. “Qəbələ”nin cavabı qolla nəticələnib. Rikardinyonun künc zərbəsindən ötürdüyü topu qapıçı meydanında müdafiəçilərin diqqətindən yayınan Dodo qapıya göndərib. “Qırmızı-qaralar”ın heyətində 10-cu avrokubok matçına çıxan braziliyalı bu matçlarda qol hesabını açıb. Erkən qol buraxan “Panatinaikos” böyük qüvvə ilə irəli atılıb, üstünlüyü ələ alıb. Topa daha çox nəzarət edən yunanıstanlıların bərabərlik qoluna bir epizodda Dmitri Bezotosnı, bir neçə dəfə isə müdafiəçilər əngəl olub. Əks-hücumlar təşkil edən komandamız isə rəqib qapısında ciddi təhlükə yarada bilməyib. Ermin Zets əldə etdiyi epizodda çərçivəyə düşə bilməməklə diqqət çəkib. Hücumlarına ara verməyən meydan sahibləri 35-ci dəqiqədə istəyinə çatıb. Sol cinahdan Nikos Karelisin cərimə meydanına ötürməsini Markus Berq tamamlayıb. Onun saxlamadan qapıçıdan yuxarı sağ küncə endirdiyi zərbə qolla nəticələnib. Hesab bərabərləşəndən sonra fəallaşan “Qəbələ” oyunda da tarazlıq yaradıb. Lakin növbəti qol epizodunu da “Panatinaikos” yaradıb. Künc zərbəsindən sonra Vernidubun uzaqlaşdırmaq istədiyi top tirdən dönüb.
İkinci hissə də afinalıların hücumları ilə başlayıb. Komandamız isə daha çox əks-hücumlar təşkil edib. Belə həmlələrdən birində rəqib qapıçı kobud səhvə yol versə də, Ermin Zets topa daha tez çata bilməyib. Meydan sahiblərinin Berqin baş zərbəsi ilə tamamladığı hücumunda isə top tirin üstündən keçib. “Qəbələ”nin növbəti əks-hücumu isə qolla başa çatıb. Komandamızın ikinci qolunu da kapitan vurub. Aleksey Qayın uzaqdan ötürməsini qapıçı meydanına sıçrayan Dodo yaxın yuxarı küncə endirdiyi qüvvətli zərbə ilə tamamlayıb – 2:1. Bir müddət sonra oxşar vəziyyətdə Arif Daşdəmirovun ötürməsini qapıya zərbə ilə bitirən Zetsin fərqlənməsinə qapıçının reaksiyası mane olub. Bundan sonra əvəzetmələrlə oyunda dönüş yaratmağa çalışan Yunanıstan klubu təzyiqi artırıb. Bu, komandamıza əks-hücumlar yaratmaq imkanı yaradıb. Bezotosnı bir neçə dəfə rəqibin güclü zərbəsini dəf etməyi bacarıb. 78-ci dəqiqədə isə meydan sahibləri bərabərlik qoluna imza atıb. Nanonun cərimə zərbəsindən sonra komanda yoldaşına toxunub istiqamətini dəyişən top qapıçımız üçün qarşısıalınmaz olub. Bundan sonra da rəqibin hücumlarına əks-həmlələrlə cavab verən komandamız qrup mərhələsinə adlamaq üçün sərfəli olan bu nəticəni qoruya bilib.
Beləliklə, ardıcıl ikinci səfər oyununda heç-heçəyə nail olan “Qəbələ” tarixi uğura imza ataraq, UEFA Avropa Liqasının qrup mərhələsinə vəsiqə qazanıb. Ardıcıl 5 avrokubok oyununda uduzmayan komandamızın ilk dəfə yüksəldiyi qrup mərhələsindəki rəqibləri sabah Monakoda keçiriləcək püşkatmada müəyyənləşəcək.
“Panatinaikos”
15. Luk Stil
4. Georgios Kotrumbis
20. Statis Tavlaridis
21. Nano
24. Serxio Sançes
28, Xristos Burbos
(8. Tassos Laqos, 77)
10. Zeka (k)
29. Sotiris Ninis
32. Daniel Pranyiç
(33. Mladen Petriç, 66)
9. Markus Berq
19. Nikos Karelis
(7. Viktor Klonaridis, 67)
Ehtiyat oyunçular:
1. Stefanos Kotsolis
12. Nikos Marinakis
14. Abdul Ayaqun
23. Nikos Kaltsas
Baş məşqçi: Yannis Anastasiu
“Qəbələ”
22. Dmitri Bezotosnı
3. Vojislav Sttankoviç
15. Vitali Vernidub
20. Rikardinyo
21. Arif Daşdəmirov
6. Rəşad Sadiqov
10. Dodo (k)
19. Aleksey Qay
9. Sergey Zenyov
69. Aleksey Antonov
7. Ermin Zets
(4. Elvin Camalov, 86)
Ehtiyat oyunçular:
33. David Pietrzkeviç
5. George Floresku
8. Məhəmməd Mirzəbəyov
11. Asif Məmmədov
17. Qismət Alıyev
66. Samir Zərgərov
Baş məşqçi: Roman Qriqorçuk
