Azərbaycanda yeni futbol liqası yaradılıb. 19 yaşlı futbolçulardan ibarət komandaların mübarizə aparacağı həmin yarışda “Qəbələ” FK-da təmsil olunur. Bu məqsədlə “Qəbələ” FK da 19 yaşlı futbolçulardan (1995 və 1996-cı il təvəllüdlü) ibarət yeni kollektiv də (“Qəbələ” U-19) formalaşdırılıb.
İlk dəfə təşkil olunan U-19 Liqasında “Qəbələ” ilə yanaşı daha 6 klubun – “Neftçi”, “İnter”, “Qarabağ”, “Bakı”, “Sumqayıt” və AZAL-ın təmsilçiləri də yarışacaq. Martın 13-də start götürəcək yarış may ayında yekunlaşacaq. İlk mərhələdə 7 komanda bir dövrəli sistemlə mübarizə aparacaq. Oyunlar Bakıda, AFFA tərəfindən təyin olunmuş stadionlarda (Binə stadionu və “Dalğa Arena”da) keçiriləcək. I dövrənin nəticələrinə əsasən, ilk dörd yerin sahibi 1/2 final mərhələsinə vəsiqə qazanacaq. Bu mərhələdə oyunlar ev-səfər sistemi ilə keçiriləcək. U-19 Liqasının püşkü də atılıb. Püşkatmaya görə, “Qəbələ” ilk turda “Rəvan”la qarşılaşacaq. Matç martın 13-də Binə stadionunda baş tutacaq.
Qeyd edək ki, U-19 Liqası UEFA-nın tövsiyyəsinə əsasən yaradılıb. Ali futbol qurumundan AFFA-ya gələn bu təklif cari mövsüm üçün tövsiyə xarakteri daşıyır. Lakin təklif növbəti mövsümdən klub və milli federasiyalar qarşısında məcburi tələb kimi qoyulacaq. Məqsəd peşəkar komandaların heyətinə düşmək istəyən gənc futbolçulara dəstək olmaq, 19 yaşlılar arasında milli komandaların hazırlığını daha da gücləndirməkdir.
Yeni formalaşdırılan “Qəbələ” U-19-un hazırlığı “Qəbələ”nin əvəzedicilərdən ibarət komandasının məşqçilər korpusuna tapşırılıb. Komandanı çempionat oyunlarına “Qəbələ”nin əvəzedicilərdən ibarət komandasının ispaniyalı baş məşqçisi Luis Araqon çıxaracaq.
Yeniliklə bağlı L.Araqonun münasibətini öyrəndik. İspan mütəxəssis bunun “Qəbələ” üçün çox faydalı olacağını söylədi:
“Yeni liqanın yaradılması haqqında qərarı ötən həftə almışıq. Şəxsən mən bu təşəbbüsü çox bəyənirəm. Bir mütəxəssis kimi deyə bilərəm ki, U-19 Liqasının və müvafiq yaş qrupu üzrə komandaların yarışının təşkili gənc futbolçuların inkişafına təkan verəcək. Öz təcrübəmdən bilirəm ki, akademiyanı bitirən 17 yaşlı gənclər klubların əsas və əvəzedicilərdən ibarət komandalarına düşməkdə çətinlik çəkirlər. Onlar peşəkar kollektivlərdə 20-21 yaşlılarla rəqabətə davam gətirə bilmirlər. Onların hazırlıq səviyyəsi peşəkar liqalarda oynamağa imkan vermir. Amma bundan sonra bu sahədə problem olmayacaq.
“Qəbələ” U-19 komandasının heyəti akademiyanın 17 yaşlı futbolçularından və əvəzedicilərdə çıxış edən gənclərdən təşkil olunub. Yeni komanda hələlik həftədə bir dəfə olmaqla məşqə çıxır. Bu kollektivin yaradılmasının bir üstünlüyü də ondadır ki, burada həm akademiyanın, həm də əvəzedicilərin üzvləri oynamaq imkanı əldə edirlər. Çempionata gəlincə, məni maraqlandıran əsas məsələ mükafat deyil, futbolçularımızın daha çox oynamasıdır. Çempionat oyunlarının Bakıda keçirilməsinə gəlincə, bir qədər çox məsafə qət etməli olacağıq. Amma futbolçularımın təcrübə toplaması naminə, eybi yoxdur, bu əziyyətə qatlaşmağa hazıram”.
| I tur, 13 mart |
| Oyunlar | Saat | Stadion |
| Rəvan - Qəbələ | 13:00 | Binə stadionu |
| AZAL - Neftçi | 14:00 | Dalğa Arena |
| Bakı - Sumqayıt | 16:00 | Binə stadionu |
| II tur, 23 mart |
| Oyunlar | Saat | Stadion |
| Neftçi - Rəvan | 13:00 | Binə stadionu |
| Qəbələ - Bakı | 14:00 | Dalğa Arena |
| Qarabağ - AZAL | 16:00 | Binə stadionu |
| III tur, 27 mart |
| Oyunlar | Saat | Stadion |
| Bakı – Neftçi | 13:00 | Binə stadionu |
| Rəvan - Qarabağ | 14:00 | Dalğa Arena |
| Sumqayıt - Qəbələ | 16:00 | Binə stadionu |
| IV tur, 3 aprel |
| Oyunlar | Saat | Stadion |
| Qarabağ – Bakı | 13:00 | Binə stadionu |
| Neftçi - Sumqayıt | 14:00 | Dalğa Arena |
| AZAL - Rəvan | 16:00 | Binə stadionu |
| V tur, 10 aprel |
| Oyunlar | Saat | Stadion |
| Sumqayıt - Qarabağ | 13:00 | Binə stadionu |
| Bakı - AZAL | 14:00 | Dalğa Arena |
| Qəbələ - Neftçi | 16:00 | Binə stadionu |
| VI tur, 12 aprel |
| Oyunlar | Saat | Stadion |
| AZAL – Sumqayıt | 13:00 | Binə stadionu |
| Qarabağ - Qəbələ | 14:00 | Dalğa Arena |
| Rəvan - Bakı | 16:00 | Binə stadionu |
| VII tur, 17 aprel |
| Oyunlar | Saat | Stadion |
| Qəbələ – AZAL | 13:00 | Binə stadionu |
| Sumqayıt - Rəvan | 14:00 | Dalğa Arena |
| Neftçi - Qarabağ | 16:00 | Binə stadionu |
