QƏBƏLƏ FC

“Qəbələ” İdman Klubunun təmsilçisi Pərviz Abdullayev növbəti titulunu qazanıb. Əməkdar idman ustası, peşəkar kikboksinq üzrə 5 qat dünya çempionu, Bakıda keçirilən IV İslam Oyunlarının uşu sanda üzrə bürünc mükafatçısı, Kobra ləqəbi ilə tanınan idmançı “ACB KB”nin dünya kəmərinə yiyələnib. 77 kq çəki dərəcəsində çıxış edən kikboksçu bu uğura Rusiyanın paytaxtı Moskvada keçirilən “ACB KB 15” turnirində imza atıb. Döyüşçümüzün kəmər uğrunda qarşılaşmadakı rəqibi çeçen əsilli Rusiya idmançısı İslam Baybatırov olub. Abdullayev döyüşün 3-cü raundunda nokautla qalib gələrək dünya kəmərini qazanıb.

Xatırladaq ki, bu qarşılaşma Pərviz Abdullayevin peşəkar karyerasındakı 54-cü döyüşü olub. Abdullayev 23-ü nokautla olmaqla, 47 qələbə qazanıb.